繼續同史友們介紹我國古代嘅一啲兵器冷知識，喺仲未有槍炮出現嘅時代，古代嘅兵器除咗弓弩可以稱霸戰場之外，一直都有流傳住「槍乃百兵之王，劍為百兵之君，棍為百兵之首，刀為百兵之帥」嘅講法，之不過其實喺古代戰爭當中係有一種兵器稱霸800年，呢種兵器正係「戟」。
「戟」其實就係矛以及戈嘅複合體，簡單嚟講就係喺戈嘅頂部加裝矛尖嘅設計，使用起上嚟既可以刺向敵人，又可以橫勾殺敵。「戟」與此同時亦都係一種儀仗兵器，而喺戰場之時就係先秦至秦漢魏晉軍中裝備嘅制式裝備，真係相當之多功能。
咁點解一樣咁多功用嘅武器會由原本稱霸戰場嘅地方，最尾慢慢走向沒落呢？呢一點就同後世作戰方式改變有關。喺春秋戰國時期，「戟」係一種戰場上常用嘅武器，甚至喺雙方交戰之時仲會有士兵專門持「戟」用於車戰之上，所以「戟」又被稱為「車戰五兵」之一。但後來去到東晉十六國時期、南北朝之時，戰爭嘅模式就開始改變，騎兵與戰馬基本上都披重甲，而車戰亦都唔係主要嘅戰鬥方式，所以亦都令到「戟」嘅殺傷力大減，慢慢就為刀所取代。
原圖嚟自網絡